LAERSKOOL DIE POORT

ONS SPORE

Welkom by die Kaalvoet-Poortjies!

POORTJIE VISIE

Dit is ons visie om ‘n gesonde leerkultuur binne ‘n landelike atmosfeer te skep waar kinders nog kinders kan wees.

POORTJIE MISSIE

Ons glo dat die basis van die kind se totale ontwikkeling en verdere studie gedurende die laerskooljare gevestig word. Met dit ingedagte, gryp al die onderwysers by Laerskool Die Poort die uitdaging aan om, tesame met die ouers, aan elke kind die geleentheid te bied om sy of haar volle potensiaal te ontwikkel wat akademie, sport, kultuur en sy/haar menswees betref.

POORTJIE WAARDES

Vriendelikheid
Betroubaarheid
Beleefdheid
Respek
Hardwerkendheid
Behulpsaamheid
Al hierdie Poortjie-waardes word gebou op die fondasie van ons 3 hoofwaardes naamlik:
Karakter
Balans
Respek

SKOOLWAPEN

SKOOLLIED

Van al die ligbakens in heel hierdie oord, skyn geeneen so helder as die Laerskool Die Poort. Hier sien ons die poorte wat lok en wat wenk na dit wat die toekoms ons almal wil skenk. Poorte tot diens aan ons volk en ons taal en ‘n poort ook tot Hom wie se lig ons bestraal.

Met skouer geplaas aan die wiel, waar dit hoort, sal ons alles bied aan ons skool, Die Poort. Met skouer aan die wiel, met skouer aan die wiel, met skouer aan die wiel vir ons skool – Die Poort.

POORTJIE GESKIEDENIS

Die geskiedenis van ons skool:
  • Laerskool Derdepoort was die eerste skool in die omgewing. Die landbouhoewes van Derdepoort en Kameeldrift het egter so ontwikkel dat daar ‘n behoefte vir ‘n skool ontstaan het. ‘n Kolonel Cilliers en Majoor De Beer skenk 4 morg grond waarop ons skool gebou is.
  • Die skool open vir die eerste keer: 18 Januarie 1949. Daar was net 61 leerlinge, 2 onderwysers en Mnr. Wessels was die waarnemende hoof. Die eerste klasse was ‘n tent en ‘n ou huis. Dit was baie ongerieflik, veral toe dit winter word. In daardie tyd was die skool se naam Die Poortskool.
  • Op 11 Mei 1949 word daar tydelike asbesklasse opgerig (4 klasse en ‘n kantoor). Wanneer hulle ‘n saal nodig gehad het, het hulle die mure tussen die klasse uitgehaal en later weer teruggesit. Op daardie stadium was daar nog nie skoolklere nie.
  • Op 17 Januarie 1950 kry Laerskool Die Poort sy eerte permanente skoolhoof – Mnr. J.A Visser. Die skool begin die jaar met 81 leerlinge.
  • Die meeste van die leerlinge het in daardie tyd met ‘n bussie skool toe gekom. Die bussie se naam was “Die Hoenderhok”. Dit was ‘n ou weermagtrok wat geel geverf was en lang, dun houtsitplekke en geen vensters gehad het nie. Sifdraad is voor die vensters gesit sodat die kinders nie kon uitval nie. Die boere se melkkanne is ook op- en afgelaai as hulle die kinders in die oggend oplaai.
  • Die enigste sport- en buitemuurs was Voetbal en Korfbal. Hulle het baie skoolkonserte gehou.
  • Aan die einde van 1952 was daar 181 leerlinge in die skool.
  • Die 2de skoolhoof was Mnr. Geyer. Vir hom was dit belangrik dat die Departement van Onderwys ‘n permanente gebou oprig. Op 31 Oktober 1961 word ons permanente gebou in gebruik geneem (saal, kantoor, voorste blok, Gr. R-klas). Daar was nog nie Gr. R-klasse nie. Dit was Gr. 1-klasse.
  • Mnr. Peet Pienaar was ons skool se 8ste skoolhoof. Hy het op 1 April 2002 hier begin.
  • Ons huidige hoof is Mnr. Johan Breet.

Oor die jare was daar baie veranderinge, maar ook dinge wat dieselfde gebly het.

DINGE WAT DIESELFDE GEBLY HET

  • Leuse: Skouer aan die wiel
  • Kleure: Wit, geel en blou
  • Skoollied

DINGE WAT VERANDER HET

  • Skoolwapen
  • Naam: Die Poortskool – Laerskool Die Poort
  • Standerd – Graad
  • Personeel
  • Terrein, geboue
  • Dissipline – Straf
  • Administrasie: Afrolwerk, rekenaars
  • Sportsoorte
  • Kleredrag
  • Vakke

ONS SKOOL SE LEUSE, SKOOLLIED EN WAPEN

  • Ons Leuse: Skouer aan die wiel. Dit beteken werk saam om bo uit te kom.
  • Skoollied: Geskryf deur Mev. Kotze (woorde)
  • Getoonset: Mnr. Taljaard (wysie)
  • Skoolwapen: In die beginjare het die skool ‘n kompetisie gehad om te kyk wie kan die beste skoolwapen ontwerp. Die Gr.1-juffrou, Eugenie Wood, het gewen. Die wapen is later met ‘n rekenaar so ‘n bietjie meer modern gemaak.
  • Betekenis van ons wapen
    • Son: Jy is nog aan die begin van jou lewe, jy moet jou lig laat skyn.
    • Poort: Ons is naby ‘n poort in die Magaliesberg. Daarom is die naam Die Poort.
    • Wawiel: Dit kom van die leuse af, skouer aan die wiel.